Mere shaher mein ek chowk hai
Jahaan gaadiyan roz dhul udaati hai
Ek veerta ki chuppi dab si jaati hai

Har November ki ek subah
Phoolon se saja diya jaata hai woh chowk
Phir, phir se dhul mein lipat jaati hai

Gurgaon se Ranikhet tak
Kumaon ki ghatiyon se Ladakh ki barfili hawaaon tak
Us chowk ki dastaan bahut door jaati hai

Shahar us chowk ke chakkar lagata hai
Par rukta nahin, padta nahi

Woh kahaani jo chhupi hui hai
Itihaas ke panno mein

Aise hi kitne anginat chowk
Aur kitne hi anginat chakkaron mein
Bhoolna asaan hai
Azaadi ko kayam rakhna
Roz ka kaam hai

Yeh chowk, yeh phool, yeh ek din ke tyohaar
Kya yeh kabhi hamaare zameer ko jaga payenge?
Ya har saal sirf ek din ki shraddhanjali
Se hi hum apni karzdari nibhayenge?